CCLXI.

1369, Januar 2. Ottmachau.

Bischof Preczlaw vidimiert die Urkunde No. CCXLV.

In nomine domini amen. Nos Preczlaus dei gratia episcopus Wratislaviensis ad singulorum presentium et futurorum, quorum interest, quo ad submissa negotia tenore presentium deducimus notionem, quod constitutus in nostra presentia religiosus frater Henricus de Stregonia alias de Glacz cantor et professus monasterii in Camencz Cisterciensis ordinis Wratislaviensis dyocesis, suo . . abbatis conventus et singularium personarum dicti monasterii nominibus quandam patentem litteram nostro et venerabilis nostri Wratislaviensis capituli sigillis maioribus sigillatam, salvam, sanam et integram omnique suspicione carentem exhibuit, petens eam sub nostri decreti interpositione transsumi et exemplari de verbo ad verbum fideliter et redigi in formam publici documenti, presertim cum in causis arduis monasterium Camencz predictum ad presens contingentibus in remotis partibus idem monasterium et fratres eius ea uti necessario habeant et ex viarum manifesto discrimine sibi et monasterio in expositione originalis litere verisimiliter timeant periculum imminere. Cuius quidem litere tenor omni descriptione sigillorum eius per omnia dinoscitur esse talis: - No. CCXLV. - Cui littere, duo sigilla oblonge figure, quorum unum maius erat altero, de cera communi sive glauca in filis sericeis viridis et rubei coloris erant impensa. In primi igitur sigilli medio intrinsecus ad faciem quedam ymago pontificalibus induta manu ad benedicendum dextra elevata et in sui manu sinistra tenens baculum pastoralem, sedens in consueta pontificali sede sub quodam elevato et decorato ciborio sculpta, ab intuentibus prima facie videbatur. Ad cuius quidem predescripte ymaginis latus dextrum clipeus triangularis figure sex signatus lyliis atque ad sinistrum eiusdem pontificalis ymaginis latus predicte triangularis figure clipeus castro cum tribus sculptis turribus designatus etiam apparebant; sed et in sigilli ipsius circumferentia tytulus talis sculptus corporibus sive capitalibus literis legebatur: S. Predzlai dei gra. epi. Wratislavien. Aliud vero sigillum minus iam descripto sigillo duas ymagines sculptas intra circumferentiam et in sui medio continebat, quarum ymaginum una apparuit quasi nuda, cuius sculptum corpus quasi ad medium tegebat; alia quedam sculptura ad instar aque meatus facta atque ad ipsius ymaginis capud, figura columbe ad volandum alis expassis, representans spiritus sancti formam, a cuius etiam proxime descripti ymaginis faciem alia ymago sculpta pilosa, que sua manu dextra verticem prime ymaginis tetigit, salvatoris nostri recipientis baptisma a Johanne benedicto baptista effigiem denotans clare et expresse ab intuentibus videbantur. In circumferentia autem sigilli eiusdem cruce premissa huiusmodi tytulis legebatur: † S. capituli Wratizlavien. eccle. sei Johis. Nos igitur Preczlaus, episcopus Wratislaviensis pretactus, iustis et rationabilibus dicti fratris Henrici suo et monasterii Camencz predicti nominibus supplicantis devote ferventibus precibus inclinati, considerantes proinde, quod propter varios et diversos casus contrarios se fortune offerentes frequenter possit in expositione et exhibitione crebra prescripte originalis littere dicto monasterio et eius fratribus irrecuperabile evenire periculum, cui debita solicitudine volentes obsistere, originalem litteram suprascriptam cum descriptione sigillorum eius per Petrum quondam Nicolai de Cunczindorff, nostrum publicum notarium infrascriptum transcribi atque de verbo ad verbum redigi mandavimus in formam huius publici documenti. Et quia per magistrum Nicolaum de Friberg, auditorem causarum nostre curie, a nobis subscripta specialiter in mandatis habentem cum exacta diligentia auscultantem et Petrum de Cunczindorff predictum legentem compertum est, presens transcriptum seu transumptum cum originali prescripta littera in omnibus et per omnia concordare, prout nobis per eosdem de hoc facta extitit plena fides, volumus, declaramus, dicimus et decernimus, quod deinceps huic presenti transumpto plena adhibeatur fides in iudiciis et extra ipsumque fidem faciat in agendis ac si prescripta originalis littera presentialiter appareret. Quibus omnibus et singulis pro tribunali sedentes in hiis scriptis auctoritatem nostram ordinariam interponimus et decretum. Ad maiorem etiam evidentiam omnium premissorum nostrum sigillum maius presentibus est appensum. Actum et (datum) anno domini millesimo trecentesimo sexagesimo nono, indictione VII. IIIo. Nonas Januarii in estuario albo castri nostri Othmuchow hora quasi none; presentibus dominis et magistris: Bertholdo canonico castri Rathiboriensis phisico, Nicolao de Friberg auditore causarum predicto, Nicolao de Z . . . (in Bolezlavia), Johanne in Waldow ecclesiarum plebanis cum pluribus aliis nostris fidelibus fide dignis testibus ad premissa vocatis specialiter et rogatis.
Signum notarii.
Et ego Pe(trus quondam Nicolai) de Cunczindorff, clericus Wratislaviensis dyocesis publicus imperiali auctoritate notarius, de mandato reverendi in Christo patris domini mei Preczlai, Wrat. (episcopi pre)dicti et ad fratris Henrici cantoris prefati requisitionem instantem litteram originalem prescriptam salvam, sanam et integram, ut prescribitur, vidi et diligenter inspexi, eamque prorsus omni vicio et suspicione carentem reperi et totum eius tenorem de verbo ad verbum, prout in ipsa comperi, nil minuens, mutans, aliqualiter vel augmentans, quod sensum immutet aut viciet intellectum, transcripsi et transumpsi atque cum interpositione decreti predicti domini mei episcopi, cui et singulis premissis una cum testibus prenotatis presens interfui, in hanc formam publicam redegi et diligenti collatione prehabita cum magistro Nicolao de Friberg pretacto, cum presens transumptum inveni cum originali littera prescripta in omnibus concordare, me nomine proprio et signo meis consuetis subscripsi in testimonium veritatis.

Or. Perg. mit dem beschädigten S. des Bischofs an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.